لهارون بنادي

الراوي/محمد النذير عبدالله

لِهارون بنادي يا سمّاع نِداي

بيك زرعِي وحصادِي وغيرك مافي رأي

***

يا الخِيرك مقسّمْ لي من ليك أطاعْ

يـا صُبحـاً تنسمْ يـا لين الطِّبـاعْ

هيبة أبوي طلسَمْ ما هيبة سِباعْ

بالأنـوار موسّـمْ سـرك ما بيُـزاعْ

***

الفي الليل بروكَا وفي النهمَات سُراعْ

ديل هم البروكَا في حُلـة شُعـاعْ

ديل البعرفوكَا ما النايمين شِباعْ

وارث حق أبوكَا وعِندك باعْ و باعْ

***

في الحضرات مؤكدْ مرفوع ليك أذانْ

قومك بيك تسعدْ وقلوبهم تُصانْ

مادحك ما مُهدّدْ مطلوقلو العنانْ

مهمن ليك مجّدْ قدرك ماهو دانْ

***

أبويَ في طبعِ جدُه رباي للمُريدْ

لين أبـويَ ردُه للشقي والسعِيدْ

عالية أبـويَ يدُه بفوق كُـل إيدْ

مافي القاسُو حدُه بحرُه دوام يزيدْ

***

كرامته الإستقامة والخُلق القوِيمْ

وناساً كان نظامها الفِعِل الذَّميمْ

ساقهم وكان إماما وعرفهُم الكريمْ

واداهُـم لِجامـا ومـن المُلكِ مِيـمْ

***

محمد قلبُه غافِل وما لازم الصّـوابْ

من أذكاره جافِلْ قلبُه صِبح خَـرابْ

في كُل المحافلْ وفي يُوم الحِسَابْ

دايرك ليهُ كـافِلْ ولكُل الصّحَـابْ

***

السلام ما لاحا من جيهة ام رخامْ

في ليل أو صباحا في لحظة هُيامْ

منظر فِيه راحَة أو رَدْ للسلامْ

من سَيدْ المِلاحا لِمنْ بيهُ هَامْ

...